Abstract:
Ndzavisiso lowu wu kanela hilaha swithopo swi nga na nkucetelo hakona eka mahanyelo ya Vatsonga. Nkoka wa dyondzo leyi i ku komba Vatsonga laha va humaka kona na mahanyelo lama hlohloteriwaka hi swithopo swa swivongo swa vona. Xikongomelonkulu xa ndzavisiso lowu i ku lavisisa swin’wana swa swithopo swa swivongo swa Vatsonga na nkucetelo wa swona evuton’wini bya vanhu lava. Ntirho lowu wu ta languta swithopo swa makumembirhin’we leswi nga kona eka swivongo swa Vatsonga. Mulavisisi u hlawurile swivongo handle ko landzelela maendlelo yo karhi, kambe u ta hlawula ngopfu swivongo leswi kumekaka hi xitalo kumbe leswi taleleke hi vavulavuri eka Vatsonga. Nkanelo wa mahungu wu langute eka swihlawulekisi swa swithopo swa swivongo na nkucetelo eka vinyi va swona. Vakhegula na vakhalabye vo ringana ntlhanu eka xivongo xin’wana na xin’wana lava nga na vutivi bya matimu ya swivongo va hlokohlisiwile ku kuma swithopo na matimu ya swona eka xivongo xin’wana na xin’wana.
