Abstract:
Vanhu vo tala va vile xiphemu lexi endleke leswaku ndzavisiso lowu wu humelela. Ndzi khensa nghamu na vana lava va ndzi hlohloteleke no ndzi seketela hi mianakanyo. Ndzi tata ku khensa eka vatswari lava va nga phuphu ya mina. Vamakwerhu lava a va ndzi khutaza eka gondzo leri a ri nga olovi, kambe va ri olovisa leswaku ndzi kota ku rhelela. Ndzi ri, xandla eka henhla xin’wana xandla!
Eka wena mudzaberi wa thesisi leyi, Dokodela Chauke M.T, namuntlha ndzi dya mihandzu leyi u tikarhateke swinene hi ku chela manyoro u cheleta yi kala yi vupfa. U bile comana swikwembu swi kala swi huma kutani namuntlha ndzi thwasile hikuva nyongwa se ndzi yi khomile hi mavoko ya mina. Dokodela Babane M.T na wena u vile mupfuneti wa mudzaberi hi vutshembeki.
Tatana Maluleke (Ngwenya) Tinyiko na vapfuneti va wena hi tlhelo ra ku thayipa xitsariwa lexi wa khensiwa. Hakunene u ngwenya. Sesi Kudakwashe Chirobe, nseketelo na mitirho ya wena eka vuhumelerisi bya thesisi leyi swi khenseka hi xiheri (Zvakanaka shamwari!). buti Respect Mlambo na wena sesi Kudakwashe migingiriko ya n’wina ya ku ya hala na hala ku tiyisisa leswaku xitsariwa lexi xi tixaxametisa na swilaveko swa xihofisi swi tswarile mihandzu leyinene.
I vanyingi lava hoxeke xandla ehenhla ka ndzavisiso lowu, ndzi ba mandla ndzi vuyelela eka n’wina hinkwenu handle ko mi hlaya hi mavito. Ndzi tlangela ku humelerisiwa ka mafumelo ya xidemokirasi laha Afrika-Dzonga. Swi ta va swi nga hetisekangi eka mina ku va ndzi vulavula hi xidemokirasi xa Afrika-Dzonga loko vito ra Dokodela Rolihlahla Mandela ri nga boxiwangi. Hi un’wana wa tinghanakana ta valweri va ndzingandzingano wa tindzimi eka swin’wana swa swona. Ingi moya wa yena wu nga wisa hi kurhula swinene. Eku heteleleni, ndzi khensa Muvumbi tanihileswi masungulo ya vutlhari ku nga ku chava Yehovha. Hi yena loyi a ndzi tsetseleleke no ndzi hletela ku kondza ndzi gwaza.
