Abstract:
Musi ḽifhasi ḽoṱhe na lushaka lwoṱhe vho sedza u losha sa u tambudza vhathu vha mbeu
ya tshinnani na ya tshifumakadzini, kha mvelele ya Tshivenḓa u losha hu tou vha u
ḓiṱongisa ngazwo. Vhavenḓa ndi lushaka lune lwa dzhia u losha tshi tshone tshithu tsha
ndeme kha mvelele yavho ya Tshivenḓa zwine zwa bvukulula tshivhumbeo na vhuvha,
u ṱhonifha, u hulisa, u ṋea tshirunzi, u tenda mulandu na vhuthu nga u angaredza.
Ngauralo, ṱhoḓisiso iyi i khou ṱoḓisisa u losha ha vhanna na vhafumakadzi kha mvelele
ya Tshivenḓa. Ṱhoḓisiso iyi i ḓo dovha ya ṱoḓisisa nḓila dzo fhambanaho dza u losha
vhukati ha kuloshele kwa kale na kuloshele kwa musalauno hu u itela uri ṱhoḓisiso iyi i
dzie kana i angalale zwavhuḓi. Muṱoḓisisi u ḓo shumisa ngona ya khwaḽithethivi hune
muhanga wa thyori wo ḓisendeka nga Afrocentrism kana Afrocentricity Framework. Iyi
ndi thyiori ine ya khwaṱhisa u ombedzela kana u khwaṱhisedza mvelele ya Vharema na
u bveledza mvelaphanḓa kha u alusa mvelele ya Vharema. Ṱhoḓisiso iyi i ḓo dovha ya
ṱalutshedza siangane, tshitatamennde tsha thaidzo, ndivho, zwipikwa na ndeme ya
ṱhoḓisiso khathihi na ṱhalutshedzo dza mathemo a ndeme.
