Thodisiso yau tsikeledzwa ha luambo lwa Tshivenda kha matabya a thelevishini fhano Afrika Tshipembe

Abstract

Luambo ndi tshipiḓa tsha ndeme kha vhutshilo ha ḓuvha ḽiṅwe na ḽiṅwe. Fhano Afrika Tshipembe hu na nyambo dza fumimbili dza tshiofisi ho katelwa na luambo lwa tswayo. Naho zwo ralo, hu na nyambo dza tshiofisi dza fumimbili, hu ḓi vha na nyambo dziṅwe dzine dza takulelwa nṱha ngeno dziṅwe dzi tshi khou ṱukufhadzwa kana hone u dzhielwa fhasi. Luambo lwa Tshivenḓa ndi luṅwe lwa nyambo dzine dza dzhielwa fhasi fhano kha shango ḽa Afrika Tshipembe, kha zwithu zwoṱhe ro katela u shumiswa phaḽamenndeni, kha vhubindudzi, matambya a theḽevishini, kha vhurereli na huṅwe fhethu hunzhihunzhi. Thaidzo ya ṱhoḓisiso iyi ndi ya u tsikeledzwa ha luambo lwa Tshivenḓa kha matambya a theḽevishini, hune naho ḽitambya ḽi ḽa Tshivenḓa hu vho pfhalesa dziṅwe nyambo u fhira Tshivenḓa tshone tshiṋe. U tsikeledzwa ha luambo ndi kale zwi hone fhedzi vhathu a vha zwi dzhieli nṱha ngauri ri khou tshila kha tshifhinga tsha zwino tshine hu ambya nyambo dzo fhambanaho. Nḓivho ya ṱhoḓisiso iyi ndi ya u sengulusa u tsikeledzwa ha luambo lwa Tshivenḓa kha matambya a theḽevishini fhano Afrika Tshipembe, khathihi na u bvisela khagala zwiitisi zwine zwa ita uri luambo lwa Tshivenḓa lu tsikeledzwe kha matambya a theḽevishini. Ṱhoḓisiso iyi i ḓo dovha ya sumbedzisa u pfhesesa nyambo dzine dza takalelwa nga vhaṱaleli na u sumbedzisa nḓila ya kushumiselwe kwa luambo kha matambya uri hu engedzwe tshivhalo tsha vhathu vhane vha ṱalela matambya. U vusuludza nga ha vhundeme ha nyambo dza Afrika Tshipembe kha khasho (media) na u themendela milayo ine ya tikedza u imelwa hu linganaho ha nyambo kha matambya a theḽevishini fhano Afrika Tshipembe. Ṱhoḓisiso iyi yo ḓi tika nga thyiori ya “The social expectation theory”. Kha ṱhoḓisiso iyi hu ḓo shuma ngona ya khwaḽithethivi ine ya ḓo shumisa inthaviyu u kuvhanganya mafhungo u bva kha vhathu vhane vho dzhenela ṱhoḓisiso iyi vho tumbulwaho ho shumiswa lushaka lwa sambula ya non-probability.