Nxopaxopo wa mahungu ya xilingwisitiki eka swihluvi swin'wana swa mbulavulo eka dikixinari ya Tsonga-English dictionary ya Cuenod, R.

Abstract

Ndzavisiso lowu wu xopaxopa ndlela leyi mahungu ya xilingwisitiki eka swin'wana swa swihluvi swa mbulavulo eka Tsonga - English Dictionary ya Cuenod. Eka mahungu ya xilingwisitiki ku langutiwile swiphemu leswi welaka eka wona, ku nga fonetiki leyi kongomaneke na ku tumbuluxa mipfumawulo ni matwariselo ya marito, fonoloji leyi kongomaneke na mipfumawulo ya marito, mofoloji leyi langutanaka na xivumbeko xa marito, ni vulongoloxamarito lebyi langutaka malongolokelo ya marito eswivulweni. Ku langutiwile leswaku mahungu ya xilingwisitiki lama boxiweke ma nghenisiwile njhani eka swin'wana swa swihluvi swa mbulavulo swo tanihi maviti, masivi, maendli, mayimelamaendli, mabumabumeri, mahlamari, maencisi, maritofularha, vusasekisi na vundhawu. Hileswaku xikongomelonkulu xa ndzavisiso lowu i ku xiya hi laha mahungu ya xilingwisitiki ma nghenisiweke hakona eka dikixinari ya Cuenod. Ndzavisiso lowu a wu langutangi swihluvi swa mbulavulo swo tanihi maengetelo ni mahlanganisi. Ndzavisiso lowu wu simekiwile ehenhla ka modular theory hikuva yi languta swiyenge swa mahungu ya xilingwisitiki ku nga: fonoloji, fonetiki, mofoloji, semantiki na vulongoloxamarito. Ndzavisiso lowu wu tirhisile maendlelo ya nhlengeleto wa mahungu na nxopaxopo wa mahungu. Hi ku tirhisa maendlelo lamambirhi, ku xopaxopiwile mangheniselo ya mahungu ya xilingwisitiki eka dikixinari ya Tsonga - English Dictionary, naswona ku tsavuriwile swikombiso leswi humeleriseke xikongomelo xa ndzavisiso lowu.