Nkucetelo wa mavito ya xilungu eka mathyelo ya mavito ya vanhu eka Vatsonga va le ka Muhlava

Abstract

Ndzavisiso lowu wu lava ku kombisa nkucetelo lowu Xilungu xi nga na wona eka mathyelo ya mavito ya vanhu eka Xitsonga. Ku thyiwa ka mavito ya munhu ku na ntikelo lowukulu eka vanhu hikuva ku komba ndhavuko, matitwelo, mitolovelo, maendlelo, ku navela na ripfumelo ra vanhu va rixaka ro karhi. Hi xitalo mavito ya tisa hungu ro karhi endyangwini, emugangeni kumbe etikweni; hileswaku hungu leri ri nga eka vito ri nga kongomisiwa eka n’wini wa vito kumbe eka vanhu van’wana erixakeni. EAfrika mavito a ya thyiwi ntsenantsena kambe ya thyiwa hikuva ya ri na nhlamuselo yo karhi. Ndzavisiso lowu wu kombisile switandzhaku swo biha leswi va ka kona loko Vatsonga va nga tirhisi mavito ya Xitsonga ku thya vana va vona. Ndzavisiso wu ta tlherile wu languta swivangelo leswi endlaka leswaku Vatsonga va thya vana mavito ya Xilungu. Xo hetelela, ndzavisiso wu langutile tindlela leti nga tirhisiwa ku endla leswaku Vatsonga va tirhisa mavito ya Xitsonga ematshan’wini ya Xilungu.