Abstract:
Ngudo iyi yo ḓitika nga u bvukululwa ha vhuḓipfi kha luambo lwa Tshivenḓa u ya nga
mvelele ya Tshivenḓa. U bvukulula vhuḓipfi ndi tshipiḓa tsha vhutshilo ha vhathu ha
ḓuvha ḽiṅwe na ḽiṅwe kha vhupo vhuṅwe na vhuṅwe. U bvukulula vhuḓipfi ndi tshipiḓa
tsha luambo lwa vhathu kha ḽifhasi ḽoṱhe tshine tshi nga bveledzwa nga nḓila dzo
fhambanaho zwi tshi ya nga muthu nga muthu. Vhuḓipfi vhu nga vha nga ha muthu
kana tshithu, vhu anzela u tshenzhelwa nga kha vhushaka ha vhathu kana nyito dzavho
hu si u bvelela fhethu hu si na tshithu. Ndi zwa ndeme uri muthu a ḓivhe maipfi o teaho
uri a kone u bveledza vhuḓipfi hawe. Vhuḓipfi a vhu koni u bveledzea hu si na maipfi.
Maipfi a wela nga fhasi ha mvelele yo tiwaho a dovha a hwala vhuvha ha mvelele
yeneyo. Ndivho khulwane ya ngudo iyi ndi u ṱoḓisisa kubvukululele kwa vhuḓipfi u ya
nga ha mvelele ya Tshivenḓa nga kha luambo lwa Tshivenḓa. Ngudo iyi i ḓo vhuedza
vhagudiswa, vhadededzi vha luambo lwa Tshivenḓa, vhaambi vha dziṅwe nyambo,
mahosi na vhadzulapo nga u angaredza na vhaambi vha luambo lwa Tshivenḓa. U itela
u vha na nḓivho nga ha ṱhoho iyi ngona ya ṱhoḓisiso ya khwaḽithethivi yo shumiswa.
Nyambedzano yo shumiswa kha u kuvhanganya mafhungo u bva kha mahosi,
vhadededzi vha luambo lwa Tshivenḓa na vhagudiswa u bva kha tshiṱiriki tsha Vhembe,
vunḓuni ḽa Limpopo, Afrika Tshipembe.
